الرئيسية / اخبار / كيف الهجره لأمريكا و ميعاد التقديم على لوتري الهجره العشوائيه لامريكا 2018 2019

كيف الهجره لأمريكا و ميعاد التقديم على لوتري الهجره العشوائيه لامريكا 2018 2019

برنامج تأشيرة هجرة التنوع أو الهجرة العشوائية هو قرعة سنوية للحصول على رخصة الإقامة الدائمة والمعروفة بإسم البطاقة الخضراء (بالإنجليزية: Green Card) في الولايات المتحدة الأمريكية بتفويض من الكونغرس وتديره وزارة الخارجية الأمريكية.

هو برنامج ينظم في كل عام، وتمنح حكومة الولايات المتحدة الأمريكية 50,000 تأشيرة فيزا للأفراد من الدول المؤهلة أى الدولة المسموح لأفرادها بالتقديم على القرعة لنفس العام للمشاركة من أجل العمل أوالدراسة أو العيش في الولايات المتحدة الأمريكية وذلك ضمن برنامج الهجرة العشوائي للحصول على البطاقة الدائمة الجرين كارد.

DV هي اختصار لـ Diversity Visa أي تأشيرة التنوع، وترجع تسميتها بهذا الاسم إلى السنة المالية التي توزع فيها الحكومة الأمريكية بطاقات الجرين كارد.

يستطيع الحاصلون على الجرين كارد السفر بحرية تامة من وإلى الولايات المتحدة لأنهم يعتبرون مثل المواطنين الدائمين على أرض الولايات المتحدة ويحق لهم بشكل قانوني العمل والإستفادة من خدمات الصحة والتعليم والضرائب والتقاعد والضمان الإجتماعي وغيرها من المساعدات، وبعد ذلك يمكن لحاملي بطاقة الجرين كارد التقدم للحصول على الجنسية الأمريكية دون أن يفقدوا جنسيتهم الحاصلين عليها من بلدهم التي ولدوا فيها ، وتعتبر بطاقات الجرين كارد سارية المفعول مدى الحياة.

التقديم الهجره لأمريكا و ميعاد التقديم على لوتري الهجره العشوائيه الامريكا 2018 2019 وكل الاستفسارات

  • يبدا من  من ٤ اكتوبر ويستمر حتي ٧ نوفمبر
    الاختيار عشوائي مش بالاسبقية ولا بالمؤهل ولا عشان المكتب الفلاني كسب عنده ناس كتير, دا في الاخر نصيب)
    التقديم بيكون من خال الرابط التالي للموقع الرسمي للهجره العشوائيه المريكا التابع لوزاره الخارجيه الامريكيه
  • https://www.dvlottery.state.gov/

*لما تفتحوه حتلاقوا كذا لينك :
*DV-2017 Instructions : دي معناها تعليمات الهجرة وكيفية التقديم
*photo tool : دا اللي بتشوف بيه اذا الصورة مقاسها صحيح ولا لا
طبعا هو بيحدد على حسب الحجم يجب الا يزيد عن 240 kbs ويكون المقاس 5*5 او 600*600 لكن ملوش دعوة بمحتوى الصورة وميعرفش اذا صح او لا
*
begin entry : دا اللي بتدوسوا عليه لما تبقوا جهزتوا الصورة خلاص وعايزين تبدأوا التقديم
——————————————————-
* ازاي تعرف اذا كان مقاسها صح؟ بتدوس على الصورة رايت كليك وتختار الخصائص بتاعتها او properties
** ميكونش فيها ظل فالخلفية او فيها فوتوشوب في الوجه
* في امثلة للصور الصحيحة في موقعهم الرسمي
* وممكن تدخلوا الصورة عالموقع دا عشان تتاكدوا ان مقاس الرأس ومكان العينين صح
http://www.greencardphotocheck.com/en/index.php
* شروط الصورة حتلاقوها ضمن الصور فالبوست
* لازم كل فرد من افراد الاسرة يتصور (الاب, الام, الطفل حتى لو عمره يوم واحد بس) واذا حد كسل يصور الاطفال وكسب حيترفض في المقابلة وحيبقى ضيع فرصة عمره
* جهز قبل ما تبدأ التقديم ايميل شغال (مهم عشان يوم النتيجة لو ضاع منك الكومفرميشن نمبر تقدر تجيبه بالايميل)
* جهز كمان رقم موبايل ( كوود مصر الدولي 002 يكتب الاول وبعده رقم الموبايل
* ممكن تكرر نفس الرقم ونفس الايميل في كذا طلب عادي
___________________________________________
نيجي بقى للاسئلة :
السؤال الاول :
يفضل يبقى معاك باسبور وتنقل منه منعاً للاخطاء لكن لو مش متوفر مفيش مشكلة, ابقى احفظ طريقة كتابة اسمك بالانجليزي واكتبهم بنفس الطريقة في الباسبور
السؤال بيبدأ ب last name ودا اخر اسم في بطاقتك/ باسبورك
middle name : انا بفضل كتابة اسم الوالد فقط لكن فيه ناس بتكتب اسم الجد كمان
first name : اسمك
* بالنسبة للي بيقدم للولاده لازم اللاست نيم بتاعك يبقى اللاست نيم بتاعهم
بمعني ان الميدل نيم في تقديم الاولاد يبقى اسمك واللاست نيم نفسه اللي انت كتبته
___________________________________________
السؤال التاني :
تاريخ الميلاد : اليوم/الشهر/السنة
______________________________________________
السؤال التالت : النوع : ذكر/انثى
_______________________________________________
السؤال الرابع : المدينة (مثلا القاهرة او اسكندرية) اللي اتولدت فيها ( لو مش عارف بتكتب ازاي بالانجليزي دور عليها في جوجل)
__________________________________________________
السؤال الخامس : البلد اللي اتولدت فيها (مثلا مصر, السعودية)
________________________________________________
السؤال السادس :
طالما مولود في مصر او اي دولة عربية (ما عدا فلسطين) بتختار
yes
وبتسيب الجزء اللي تحته فاضي
طب لو فلسطين يبقى لو مولود في غزة تختار no وتختار بعدها مصر
لو الضفة الغربية يختاروا الاردن لو هضبة الجولان يختاروا سوريا وبقية المناطق
__________________________________________________
السؤال السابع :
تدوس على choose file وتحمل صورتك انت بس (لو متزوج لسه صور الزوجة والاولاد حتتحط بعدين)
______________________________________________
السؤال الثامن : بتحط فيه العنوان اللي انت مقيم فيه حاليا
** ملوش اي لازمة بس بيتملي كده وخلاص لانهم مش بيبعتوا حاجة على الايميل ولا بيتصلوا عالتليفون, النتيجة بتعرفها من نفس موقع التقديم ان شاء الله في مايو
اول جزء تكتب اسمك بالكامل حسب ما يكفي المكان
تاني جزء بتكتب رقم العمارة واسم الشارع
تالت جزء ممكن تسيبه فاضي
رابع جزء اسم المدينة
خامس جزء اسم المحافظة
**(لو مفيش اسم مدينة اكتب اسم المحافظة بداله عادي)
الجزء السادس : حتلاقي جمبه مربع صغير علم عليه وريح دماغك بدل ما تقعد تدور على رقم بريد
الجزء السابع : اسم البلد
__________________________________________________
السؤال التاسع: البلد اللي انت عايش فيها دلوقتي
___________________________________________________
السؤال العاشر : تكتب الاول كود البلد وبعده رقم الموبايل
(مثلا : 00201001111222)
___________________________________________________
السؤال الحادي عشر :
بتكتب ايميلك مرتين
__________________________________________________
السؤال الثاني عشر :
بتعلم على اخر شهادة حصلت عليها
لو دبلوم اختار : vocational school
لو مخلص ثانوية عامة ولسة فالجامعة اختار : high school degree
لو مخلص جامعة اختار : university degree
وهكذا
___________________________________________________
السؤال الثالث عشر :
الحالة الاجتماعية تختار بقى متزوج او اعزب او ارمل او مطلق
**** اذا حد متزوج واختار اعزب عشان مش عايز الاسرة تسافر معاه حيترفض في المقابلة, اختار متزوج واكتب بيانتهم في اثناء التقديم ولما تكسب انت بتختار حيسافروا معاك ولا لا, اي كذب فالبيانات حيحرمك من السفر) وحتى لو مش حياسفروا معاك لازم تكتب بيانتهم وتحط صورهم
___________________________________________________
السؤال الرابع عشر :
اذا اعزب حتكتب 0 واذا متزوج تكتب عدد الاطفال
______________________________________________
*** بالنسبة للعزاب كده التقديم خلص, بص مرة اخيرة على الاسئلة والاجابات واكد عليها ودوس submit وحيجبلك صورة للكومفرميشن نمبر عبارة عن اسمك بالكامل تحتيه رقم بيبدأ ب 2017 وفيه حروف وارقام, الصفحة دي احفظها عندك عالجهاز اعملها سكرين شوت او صورها بالموبايل)
___________________________________________________
****** بالنسبة للمتزوجين لسة مكلمين
الاسئلة اللي بعد كده حتملاها ببيانات الزوجة وصورتها وبعد كده بيانات كل طفل وصورته بكده يبقى التقديم خلص, بص مرة اخيرة على الاسئلة والاجابات واكد عليها ودوس submit وحيجبلك صورة للكومفرميشن نمبر عبارة عن اسمك بالكامل تحتيه رقم بيبدأ ب 2017 وفيه حروف وارقام, الصفحة دي احفظها عندك
****** لو انت عايز تاخد الاسرة تهاجر معاك يبقى تبدأ تقديم تاني من الاول باسم الزوجة وتمشي نفس الخطوات كلها وبكومفرميشن نمبر تاني وبكده يبقى عندكم فرصتين للفوز واللي يكسب فيكم ياخد الاسرة معاه
__________________________________________________
******* بالنسبة للمخطوبين كل واحد فيكم يقدم طلب لوحده وفي حالة فوز احدكم تقدروا تتجوزوا بعد النتيجة وتملوا فورم الفوز وتسافروا سوا ان شاء الله
___________________________________________________
**** نقطة اخيرة بلاش نكسل في موضوع الصور وبلاش صور الموبايل, اتصور عند اي مصور ب 10 او 15 جنيه صورة بالمواصفات المطلوبة حتوفر عليك القلق ان الصورة تكون غلط ويتلغي الطلب عشان صورة
** صورة الطفل مطلوبة حتى لو عمره يوم واحد, لو محطتش صورهم وكسبت حتترفض في المقابلة وحصلت.

اكثر الاساله الشائعه في التقديم الهجره الهجره العشوائيه الامريكا لوتري و  الغرين كارد  2018 2019

1 – ينفع اقدم وانا فالسعودية؟ ينفع اخلي صاحبي يقدملى عشان هو في امريكا ف تبقى فرصتي تبقى اكبر؟

ينفع والتقديم هو هو في كل البلد لان الابليكيشن واحد وكونه في امريكا او اي دولة تانية ملوش علاقة بفرصتك فالفوز لان الاختيار عشواااااااائي وانت فالاخر تابع لبلد الميلاد

2 – ينفع اقدم اني عازب وانا متجوز عشان مسافروش معايا؟

لا لا لا عشان لو فوزت حتترفض فالسفارة لانك كذبت فالبيانات

3 – ينفع اضيف زوجتي والاولاد وميسافروش معايا ؟

ايوة ينفع طالما انت الفائز مش زوجتك

4 – هو لازم اكون كويس فالانجليزي ؟ خريج كلية معينة؟ عندي وظيفة؟

لا و لا ولا طالما معاك ثانوية او دبلوم دا كل المطلوب

5 – الاسامي بتكتب ازاي؟

الاسم الاول : اسمك

الاسم التاني : اسم الوالد

الاسم الثالث : اخر اسم

واللي عنده باسبور ينقل منه واللي مش عنده يبقى يحفظ كتب اسمه ازاي عشان لما يطلعه لكن الباسبور مش مطلوب للتقديم

6 – اكتب اسم القرية ولا المدينة في سؤال “مدينة الميلاد”

السؤال مجاوب نفسه “مدينة” الميلاد والقرية جزء من المدينة يعني عادي مش كذب ولا فيها اي مشكلة

7 – اكتب عنواني الحالي ولا القديم ولا اللي فالبطاقة ؟

مش فارقة اي واحد اصلا مش بيبعتوا حاجة عالبيت

8 – رقم البريد؟ ريح نفسك وعلم عالبوكس اللي جنب السؤال او هاته من جوجل

9 – لازم صورة جديدة ولا اقدم بالقديمة؟ هما طالبين ميكونش عدى عليها اكتر من 6 شهور لو تقدر يبقى اتصور جديد افضل وبلاش كسل

10- لو انا مطلق(ة) ومش معايا الاولاد اختار عازب؟

لا برضه تختار مطلق وتحاول تصور الاولاد في اي زيارة لكن لو مش حينفع حاول تظبط اي صورة قديمة ليهم وخلاص لكن بلاش كذب فالبيانات

11 – هل لما اكسب حيدوني سكن وشغل؟

لا بيدوك اقامة دائمة وحقوق مثل المواطن تقريبا ماعدا التصويب في بعض الانتخابات لكن السكن والشغل بتدور عليهم والمواقع كتيييير عالنت اكسب بس والباقي مقدور عليه

12 – هو عشان محجبة مش حيقبلوني؟

لو مش عايزين مسلمين كانوا خلوا بلادنا مش مؤهلة من الاول
امريكا بلد الحريات وفيه هناك جالية مسلمة ومحجبات ومنقبات كمان
بس مينفعش صورة التقديم تبقى بالنقاب ممكن بالخمار طالما الوش ظاهر ومنبت الشعر ظاهر والاذن تحت الحجاب عادي

13 – هو انا لو فزت حتشغل ايه هناك؟

اي شغل تلاقيه لحد ما تعرف البلد كويس وتتمكن من اللغة وتعادل دراستك او تدرس اللي بتحبه

14 – تكلفة ما بعد الفوز لحد السفر

330$ للمقابلة, 220$ للجرين, 2000 جنيه كشف طبي, حوالي 500 ترجمة ورق والطيران بقى حسب الوقت اللي حتسافر فيه لانه كل يوم بسعر دا كله للفرد لو اسره يبقى اضرب في عدد افراد اسرتك

ولازم طبعا مبلغ بالدولار معاك وانت مسافر يا ريت ميقلش عن 1500$ ل 2000$ دولار لو انت مسافر لوحدك واكثر طبعا لو اسرة لانك حتصرف على ايجار ومواصلات واكل وشرب واي طوارئ لحد ما تلاقي شغل

15 – الفرق بين الكومفرميشن نمبر والكيس نمبر؟

الكومفرميشن نمبر دا بتاخده بعد ما بتخلص تقديم وتحتفظ بيه كويس هو والايميل عشان تشوف بيه النتيجة في مايو ان شاء الله

الكيس نمبر دا بيطلعلك في مايو في صفحة النتيجة لما تفوز ان شاء الله ودا اللي على اساسه بيتحدد ميعاد مقابلتك

16 – هي المقابلة بتبقى امتى بعد النتيجة؟

لما تكسب بتاخد كيس نمبر بتفضل متابع النشرة الشهرية اللي بتنزل وعلى اساسها بتقدر تتنبا بيمعاد المقابلة لما يقربوا على رقمك

17 – اللوتري السنة دي اسمه 2019 ليه؟

عشان حضرتك حتقدم في اكتوبر 2017
النتيجة حتظهر في مايو 2018
المقابلات حتبدأ من اكتوبر 2018 ل سبتمبر 2019
ف عقبال ما تعمل المقابلة وتسافر حنبقى غالبا في 2019

18- المتزوجين بيقدموا ازاي؟

مرة باسمك ومرة باسمها وبتضيفوا الطرف التاني والاولاد في المرتين
واللي يفوز بياخد معاه الاسرة لو عايز

19- لو مخطوبين ؟

تقدم مرة باسمك وهي باسمها وتختاروا سينجل ولما حد فيكم يفوز بتتجوزوا والفائو بيضيف التاني في فورم الفوز وتسافروا سوا ان شاء الله

20- اصور الطفل الرضيع ازاي ؟

قعدوا على كنبة بمسند او كار سيت او نيمه على السرير ويكون صاااااحي وعينه مفتحة وتحتيه ملاية بيضا وصوره كذا مرة لحد ما تظبط معاك

21- هو التقديم فتح؟

لسه صدقني لسه , حيفتح يوم 3 اكتوبر الساعه السادسة وينتهي التقديم يوم 7 نوفمبر

 

22 – هي السنة دي اخر سنة للوتري؟

محدش عارف لسه مفيش قرار رسمي

23- المتزوج الفائز ينفع يكمل إجراءات السفر لوحده من حيث الكشف الطبى والمقابلة وفلوس الجرين ولا لازم يكمل الإجراءات باسرتة كلها

ايوة ينفع, زي ما قولنا لازم اضافتهم فالتقديم لكن في فورم الفوز لو مش حيسافروا يبقى متضيفهمش لكن لو ضفتهم يبقى لازم يحضروا المقابلة وتدفع 330$ للفرد
(ودي مش دعوة لترك الاسرة والانحراف بقى 😀 الهجرة دي عشانهم اصلا والافضل دايما انهم يسافروا معاك بدل ما تعملهم لم شمل بعد كده)

24- هو ممكن اسافر انا الاول والاسرة تحصلني؟

ينفع طبعا, انت سافر وضبط الدنيا هناك سكن وشغل وبعد كده يحصلوك في خلال 6 شهور من اصدار الفيزا

25- السؤال السادس اللي عامل قلق للناس اعمل فيه ايه؟

طالما انت مش مولود في فلسطين يبقى ملكش دعوة بيه سيبه زي ما هو وانقل عالسؤال اللي وراه اما اهل فلسطين ليهم تقسيمة تانية

لو مولود في غزة تختار no وتختار بعدها مصر

لو الضفة الغربية يختاروا الاردن وبقية المناطق اسرائيل (للاسف)

ولو هضبة الجولان يختاروا سوريا

26- مراتي حامل ؟

ربنا يتمم بخير يا رب, حضرتك حتكتب بس عدد الاطفال الموجوده حاليا والمولود بيتضاف في فورم الفوز ان شاء الله

27- انا دبلوم حختار ايه ؟

vocational school

28- انا لسه بدرس فالكلية اختار ايه ؟

high school degree

29- لو انا معهد بعد الدبلوم ؟

some university courses

30- لو من القاهرة اتصور فين؟

اي فرع من فروع كوداك وخد معاك المواصفات احتياطي

31- هي ايه المواصفات اصلا ؟

600*600 بخلفية بيضا بدون نظارة او فوتوشوب او زي عمل زي شرطة او جيش وبدون فوتوشوب فالملامح خالص مممكن الخلفية تتغير بالفوتوشوب لكن الملامح لا وحجمها يكون اقل من 240 كيلو بايت

لمزيد من التفاصيل عن الهجره الي امريكا

https://goo.gl/dTxhhz

https://goo.gl/rsaJrX

عن اسامه محمد

مدون عربي اهتم بكل ما هو جديد واقوم بتقديمه لكم

شاهد أيضاً

مباراة الأهلي والمصري في كأس السوبر المصري 2018

مباراة الأهلي والمصري في كأس السوبر المصري 2018

يلتقى فى تمام السادسة مساء اليوم الجمعة بتوقيت القاهرة فريق الكرة الأول بالنادى الأهلى نظيره ...

4 تعليقات

  1. طب وحوار الجيش ؟؟؟
    الواحد شرط يكون خلص جيش ؟؟

  2. أنا لدية رقبة للهجرة الي امريكا

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *