الرئيسية / السفر و الهجره / كيف السفر و الهجره الي تركيا من مصر و شروط السفر و الحصور علي اقامه و عمل

كيف السفر و الهجره الي تركيا من مصر و شروط السفر و الحصور علي اقامه و عمل

تركيا  الاِسم الرسمِيّ الجُمْهُورِيَّة التُّرْكِيَّة  هي دولة تقع في الشرق الأوسط. يحدها من الشمال البحر الأسودوجورجيا ومن الشرق أرمينيا وإيران ومن الجنوب العراق وسوريا والبحر المتوسط مع حدود بحرية مع قبرص ومن الغرب بحر إيجة واليونان وبلغاريا هي عضو في منظمة التعاون الاقتصادي للبحر الأسود.

تركيا دولة  جمهورية دستورية ذات تراث ثقافي قديم. أصبحت تركيا متكاملة على نحو متزايد مع الغرب من خلال عضويتها في منظمات مثل مجلس أوروبا وحلف شمال الأطلسي، منظمة التعاون والتنمية الاقتصادية، منظمة الأمن والتعاون في أوروبا وفي مجموعة العشرين (الاقتصادات الرئيسية في العالم)

عشان تعرف توصل ل تركيا لازم فيزا .. وعشان تاخد الفيزا لازم تركز معايا شويه
أولا : تأشيره تركيا ليها حالتين:
الحاله الاولي : لو كان عمرك أقل من 20 أو أكبر من 45 , فمش هتحتاج تعمل تأشيرة من السفارة , لكن هتعمل تأشيرة الكترونية من علي موقع السفاره وبتدفع رسومها بالفيزا كارد
ولو معاك شنجن ساريه او امريكا ساريه ( شرط انها تكون ساريه وقت دخولك تركيا ) بتدخل تركيا إما بفيزا من المطار من خلال ماكينات مخصصه في مطارات تركيا
إما بفيزا الكترونيه
ودة الموقع اللي بتعمل من عليه الفيزا الالكترونيه https://www.evisa.gov.tr/en/
———————————————————
الحاله التانيه : لو عمرك اكبر من 20 واقل من 45 ف هتحتاج تأشيرة من السفاره
وهنا هتنقسم علي حسب ايه اللي مكتوب في باسبورك
.
1- لو مكتوب طالب او حاصل علي مش هينفع تقدم علي تأشيرة سياحه عاديه وهتحتاج تقدم علي تأشيرة زيارة عشان تعرف تطلع التصريح الامني من مجمع التحرير
وتأشيرة الزياره لازم دعوة من شخص تركي أو من شركة في تركيا
وممكن تطلع الدعوة من بعض شركات السياحه ب 100 دولار تقريبا
.
لو انتي بنت ومكتوب في باسبورك حاصل علي او طالبه ممكن تطلعي فيزا مرافق مع زوجك او ابوكي أو اخوكي
بس بشرط لو هتسافري من مصر لازم زوجك أو ابوكي أو اخوكي يكون مسافر معاكي من مصر .. عشان تقدرى تطلعى تصريح أمنى مرافق للزوج
.
يعني لو متزوجه مثلا وعايزة تطلعي فيزا مرافق
* هيكون مطلوب من الزوج :
كشف حساب بنكي لاخر 6 شهور
جواب من جهه العمل ( أو السجل التجاري والبطاقه الضريبيه )
حجز فندق وطيران مبدئي
تأمين للسفر من اي شركه تأمين ( 3 شهور لو هتقدم في سفاره القاهرة و شهر واحد لو هتقدم من قنصليه اسكندريه )
الباسبور و صورتين مقاس 4 في 6 ..
ودة بشرط ان الزوج يكون مثبوت في باسبوره مهنه عشان يعرف يطلع تأشيرة السياحه العاديه
اما انتي هتكوني مرافق ليه وهيكون مطلوب منك باسبور و صوره شخصيه و تأمين سفر فقط
.—————————————————-
2- لو مكتوب في باسبورك مهنه , ف انت هتقدم علي تأشيرة سياحه عاديه من غير دعوة ولا أي حاجه
وهتحتاج الاوراق الروتينيه العاديه : كشف حساب بنكي لاخر 6 شهور , جواب من جهه العمل , حجز فندق وطيران مبدئي , تأمين صحي للسفر لمدة 3 شهور لو من القاهرة و شهر واحد لو من اسكندريه , الباسبور و صور شخصيه
بعد ما تملي كل البيانات علي موقع السفاره هتحجز معاد , وترفع الورق المطلوب منك وتجهز كل الورق الباقي وتروح بيه السفاره
————————————————–
سعر التأشيرة الالكترونيه حوالي 21 دولار امريكي
سعر التأشيرة السياحيه سنجل 60 دولار امريكي , مالتي 195 دولار
سعر التأشيرة الزياره سنجل 60 دولار امريكي + ( الفلوس اللي هتدفعها لشركه السياحه عشان الدعوة )
ودة موقع السفاره https://www.konsolosluk.gov.tr/ و الفيزا بتاخد حوالي اسبوع عمل وبتطلع بعدها وبتروح تستلمها
وبعد ما التأشيرة ما تطلع تروح بيها المجمع بتاع التحرير الدور الأول مكتب رقم 15 عشان تطلع التصريح الامني
——————————————————
التصريح الامني
عشان تسافر تركيا من مصر .لازم  التصريح الامني
لو انت مسافر تركيا و سنك أكبر من 18 سنه و أصغر من 40 سنه فحضرتك محتاج تصريح أمني , طيب ايه الاوراق المطلوبه للتصريح الأمني !!؟
في 4 حالات ليها :
1- في حاله فيزا الزيارة مطلوب منك الباسبور و صورته و صورة الفيزا
.
2- في حاله وجود مهنة في الباسبور يعني فيزا سياحه عاديه مطلوب منك برنت تأمينات مختوم و جواب HR مترجم بالعربي و صورة الباسبور و صورة الفيزا
اما لو انت مهنتك اللي في الباسبور ليها نقابه وهي مهنه نقابيه يعني زي دكتور مهندس محامي الخ الخ ومكتوب كلمه ” حر ” ممكن متقدمش برنت تأمينات اصلا ولا اتش ار ليتر ويكفي فقط كارنيه النقابه
.
3- لو انت معاك فيزا امريكا ساريه او شنجن ساريه وطلعت الفيزا الالكتروني ومكتوب في باسبورك مهنه او حاصل علي تقدر تطلع التصريح بالفيزا الاونلاين عادي
.
4- لو انت معاك فيزا امريكا ساريه او شنجن ساريه وطلعت الفيزا الالكتروني لكن مكتوب في باسبورك طالب مبتقدرش تطلع التصريح بالفيزا الاونلاين ولازم تكون فيزا زياره
.
.
ولازم تكون حافظ اسم الوالد خماسي
المدة اللي بيطلع فيها التصريح الامني بتتراوح ما بين يومين الي اسبوعين
التصريح بيكون صلاحيته شهرين يعني لازم تسافر خلال شهرين من استلامك للتصريح والا التصريح هيبقي لاغي وكانك معملتوش

————————————————————-
طيب أقدم تبع السفاره في القاهره و لا القنصليه في الأسكندريه ؟
لو أنت من سكان القاهره و الجيزة يبقى تقدم في القاهره فقط و ممنوع تقدم في القتصليه في أسكندريه
لو أنت من سكان اسكندريه أو الدقهليه و محافظات وجه بحري تقدم في القنصليه في اسكندريه فقط
عنوان السفاره فين يا ترى ؟
لو انت في القاهرة 25 شارع الفلكي، باب اللوق، السيدة زينب، محافظة القاهرة
وتروحها ازاي
1- بالمترو ل محطه سعد زغلول هتلاقي نفسك جنب السفاره جدا
.
2- ولو انت مكسل تغير المترو يبقي تنزل ميدان التحرير و اوصل عن الجامعه الامريكيه هتلاقي الناحيه التانيه هاردييز امشي في الشارع دا و خلى الجامعه على يمينك ادخل اول شارع على يمينك اللي هو شارع الفلكي
و امشي 7 دقايق او 10 هتلاقي السفاره على شمالك
لو انت في الاسكندريه …باب شرق….قريبه جدااااا .من محطه القطار والموقف الجديد
——————————————————
اسئله بتتسأل كتير :
1- لو اتنين رايحين شهر عسل والاتنين طلاب او الاتنين حاصلين علي يعملوا ايه ؟؟
في الحاله دي واحد منكم هيطلع تأشيرة زياره بدعوة من شخص تركي
والتاني يطلع مرافق معاه
.
2- لو زوجك شغال في السعوديه ( اي دوله برا مصر ) وعايز يقدم من مصر يعمل ايه في جواب الاتش ار ؟؟
اتصلى بالسفارة اسالى ينفع زوجك يقدم خطاب صادر من السعودية ولا لأ .. هو العادي والطبيعي ينفع طالما هيطلع مختوم من هناك بس الافضل التأكد من السفاره جايز مبيقبلوش ورق سعودي في السفاره التركيه في مصر
.
3- انا طالبه ومعنديش حساب بنكي وفلوسي كلها كاش اعمل ايه ؟؟
ينفع تقدمي بحساب باباكي او مامتك
.
4- انا طالب وعايز اسافر تركيا اعمل ايه ؟؟
للاسف الحل مع اي شركه سياحه تعملك دعوة عشان تطلع فيزا زياره
وبعد ما تطلع فيزا الزياره تروح بيها المجمع عشان تعمل تصريح امني
.
وبعد كدة تروح الهايكستب او حلميه الزتون بتاعه الجيش عشان تطلع تصريح السفر وخلي بالك بتطلعه في الاجازات بس ولو انت في اخر ترم في الكليه مش هتعرف تطلعه اصلا وملكش سفر , يعني سافر في اي سنه من سنين الكليه ماعدا اخر سنه
.
5- هل ممكن الدعوة اللي جايه من شخص تركي تترفض في السفاره ؟؟
ايوة طبعا في حاله ان الشخص اللي بيعمل دعاوي يكون محروق في السفاره , محروق في السفاره يعني السفاره عارفه انه بيعمل دعوات لكل الناس واي حد معدي من الشارع يعمله دعوه وبيعملها سبوبه عشان يكسب منها وبالتالي هو اتحرق خلاص في السفاره .. عشان كدة لازم تتأكد من شركه السياحه كويس اوي ان الشخص اللي هيعملك دعوة ميكونش محروق في السفاره
.
6- في سؤال في الابلكيشن بيقولك عملت تأمين السفر ولا لأ .. ولو عملته بيسألك عن تواريخ الصلاحيه بتاعته .. هل لازم اكون عامله قبل ما اسجل علي الموقع ولا اسجل الاول واقوله معملتش واخده معايا يوم المقابله ؟؟
الاحسن انك اول خطوة تعملها قبل ما تسجل الابلكيشن اصلا انك تكون عامل تأمين السفر وحجزت الفنادق والطيران المبدئي وبعدين تسجل عشان تكتب التواريخ كامله وتخلص نفسك
هو ينفع طبعا تقوله معملتوش وتسجل الاول وتعمله بعدين وتاخدة معاك يوم المقابله بس لو دي اول مرة ليك خليك في ال safe side واعمل تأمين السفر الاول قبل ما تملي الابلكيشن

الهجره لتركيا و ازاي تشتغل هناك
———————————————————————–

زي ما اتكلمنا في الجزء الاول عن الفيزا والتصريح الامني .. نفترض ان انت خلاص عرفت تجيب فيزا السياحه وعرفت تعمل التصريح و وصلت بالسلامه تركيا
.
ازاي تقعد قانوني وتعمل اقامه ؟
الاقامه في تركيا كذا نوع :
1- اقامه عائله : انك تكون متجوز حد تركي .. ودي ليها ميزة انك تقدر تقدم ع الجنسيه
.
2- اقامه عمل : ان حد تركي شركه او مؤسسه تعملك عقد عمل .. بتدي الجنسيه بعد 5 سنين
.
3- اقامه مستثمر : انك تستثمر مشروع او مبلغ معين في مشروع هناك .. بتدي الجنسيه بعد 5 سنين
.
4- اقامه لاجئ : بيسموها اقامه انسانيه .. او ايا كان المسمي .. وبتكون لجنسيات معينه زي السوريين
.
5- اقامه دراسيه : انك تدرس سواء علي حسابك او بالمنح .. مش بتدي الجنسيه مهما درست
.
6- اقامه سياحيه : ودي هنتكلم عنها بالتفصيل تحت بعد شويه
.
7- اقامه عقاريه : عن طريق شراء عقار .. تشتري بيت بمبلغ معين وتاخد اقامه بيه وبتكون اقامه قصيرة وبتتجدد كل سنه طول ما انت لسه مالك العقار ( مبعتوش لانك لو بعته هتتلغي الاقامه )
و الاقامه عن طريق شراء عقار دي مبتديش الجنسيه كلام مؤكد 100 % .. اقسم بالله العظيم مبتديش الجنسيه .. والله مبتديش الجنسيه ..
ده حوار عاملينه شركات السياحه هناك عشان ينصبوا علي الخلايجه اللي جايين من دبي والسعوديه ..
—————————————————————

الاقامه السياحيه في تركيا :

بتروح بفيزا السياحه او الزياره العاديه وتعمل الاقامه السياحيه هناك ودي عباره عن تصريح اقامه لمدة سنتين كحد اقصي ( ساعات بتطلع بسنه واحدة لبعض الحالات ) .. وبتتجدد بعد انتهاء المدة ..
ودي بتبقي اقامه قصيره تُمنح بغرض السياحه فقط .. ومستحيل تاخد منها الجنسيه مهما جددت ..
يعني فايدتها انك تقدر تقعد في تركيا بشكل قانوني .. وتقدر تخرج وتدخل من تركيا زي ما انت عايز وفي كل مرة بتروحها بعد الاقامه مبتحتاجش اي تصاريح امنيه تاني
.
1- انت بتقول لغرض السياحه بس يعني مش هقدر اشتغل بيها ؟
قانونا مبتقدرش .. لكن فعليا وعلي ارض الواقع العالم كله بيشتغل بيها هناك ومحدش بيتكلم
.
.
2- طيب افرض حد قالي بتشتغل بيها ليه ؟
بص دي حيله من حكومه اردوغان عشان النازحين من بلادهم لاي سبب من الاسباب يقدروا يقعدوا قانوني ويعيشوا في البلد …. و طبعا محدش هيعيش من غير شغل .. يعني لازم هتشتغل بيها .. فهما عارفين انك هتشتغل بيها وبيطنشوا .. لانهم عايزين يطنشوا .. اظن الرساله وصلت ..
.
.
3- برضو مش فاهم اشمعني عاملينها سياحه بس !! ليه معملوش اقامه تخلينا نشتغل كمان بيها ؟؟
مينفعش طبعا .. لان لو عملوا كدة الاتراك نفسهم هيقلبوا عليهم .. انت عايز تيجي علي الجاهز ب 200 ولا 300 دولار وتتساوي بالتركي في مرتبه وتقبض زي ما بيقبض .. و تزاحمه في حياته وتقدم علي الجنسيه بالاقامه دي بعد كام سنه وتبقي كأنك تركي بالظبط !!
.
اكيد مش هيسكتوا علي الوضع دة .. لكن لما بتعمل الاقامه السياحيه انت كدة مش متساوي بيه في شغله وبتقبض اقل منه ومش هتعرف عن طريق الاقامه السياحيه دي تاخد الجنسيه زيه مهما قعدت ومهما جددت .. يعني العمليه بالنسبالهم بتبقي مقبوله نوعا ما ..
.
.
4- طيب هو ممكن الاقامه دي تتلغي في السنين الجايه ونبقي ف الشارع ؟
محدش يعرف ومحدش يقدر يدخل في علم الغيب او يفتي في النقطه دي لكن كل شئ وارد
.
.
5- طب والحل ايه منا اكيد مش عايز اجي بأسرتي ونقعد فيها وبعدين الاقامه دي تتلغي ؟؟
انت وشطارتك .. حاول تجتهد في شغلك وعلاقاتك وتقوي التركي بتاعك وتتميز في مجالك لغايه لما تلاقي حد تركي يعملك عقد عمل وبالتالي تعمل اقامه عمل وساعتها محدش يقدر يفتح بوقه معاك
.
.
6- طيب منا اشوف حد تركي من دلوقتي وانا في مصر يظبطني بعقد عمل وبدل الاقامه السياحيه و وجع القلب دة اعمل اقامه عمل مباشره … ودنك منين يا جحا ؟؟
.
لا مهي مش بالسهوله دي! .. شروط اقامه العمل كتيرة وصعبه .. لازم يكون عدي على تأسيس الشركه اللي هتشغلك اكتر من سنة و يكون رأس مالها اكبر من 50 ألف دولار وارباحها السنويه 400 الف دولار مبلغ اجمالي او صادرات بقيمه 250 الف دولار
.
ولازم يكون قصاد كل واحد اجنبي هيشتغل فيها ( اللي هو انت يعني ) .. 5 اتراك شغالين .. ولازم يكون مرتبك ضعف مرتب الاتراك ( في بعض الوظائف بتكون ضعفين او 3 اصعاف )
.
و اصلا  حتي لو حققت كل دة بيكون فيه كوته لعدد الاجانب اللي بيدوهم اقامه عمل كل سنه ..
يعني ممكن اصلا تتوافر كل الشروط دي لكن يكون عدد الاجانب اللي واخدين تصريح من كل الجنسيات في السنه اللي جبت فيها انت عقد العمل بتاعك يكون كتير اوي اوي فمش هيدولك وقتها الاقامه حتي لو جبت عقد عمل ..
.
يعني عشان اجنبي يشتغل بأقامه عمل الموضوع صعب و عشان كدة الشركات والمصانع مبتاخدش اجنبي غير واحد متميز ومتخصص .. فهمت بقي ليه متقدرش تجيب عقد عمل من وانت برا تركيا !
—————————————————————————
طيب ايه خطوات الاقامه السياحيه دي والاوراق المطلوبه ؟؟
.
ممكن تروح لاي مكتب سياحه موجود ف تركيا او اشخاص مصريين موجودين هناك وترميله 300 ولا 350 دولار ويروح معاك المقابله كمان وتاخد الاقامه
.
اما لو انت من محبي الاعتماد علي النفس ركز معايا ف الكلام اللي جاي
لو انت فوق ال 18 سنه هيطلبوا منك الطلبات الجايه :
——————————————————-
1- جواز سفر, صوره منه , ترجمه جواز السفر للتركي
2- تأشيرة الدخول و اخر ختم دخول للاراضي التركيه بشكل نظامي من أي معبر حدودي
3- ايصال تصريف بقيمة 6000 دولار, أو كشف حساب جاري من البنك يكون الرصيد فيه نفس القيمة المطلوبة بالدولار ( بيتغاضوا عنه ومبيطلبهوش اوقات كتير )
4- الرقم الضريبي او رقم المعاملات الماليه
5- طلب الرانديفو الأساسي .. رانديفو يعني المعاد اللي بتاخده عشان تقدم علي الاقامه
6- عقد ايجار صالح و حقيقي موثق عند كاتب العدل ويكون العنوان عنوان رسمي في سيستم الدوله .. وتصديق عقد البيت في ال noter ..
7- صحيفه السوابق ودي اسمها Sabika Belgesi وبتطلعها من المحكمه
8- اثبات العنوان بتأكد انك ف العنوان الفلاني زي السجل المدني عندنا + اثبات الاسم واللقب كامل + ايصال رسوم للدوله لاصدار البطاقه البلاستيكيه واجراء المعاملات ودي ب 50 دولار .. و 6 صور شخصيه ملونه ليك
9- تأمين صحي اسمه سيجورتا لو هتعمل اقامه لمدة سنة هتدفع تأمين من 80 ل 100 دولار ( بتختلف حسب الشركه ) لكل شخص .. ركز لكل شخص
و لو هتعمل اقامه سنتين يبقي هتدفع تأمين الضعف من 160 ل 200 دولار
ولو عائلة هتعملها , لازم كل واحد يكون عنده تأمين صحي… وبيستفيد من التأمين الصحي بتخفيض بعض تكاليف الرعاية الصحية حتى 60%
ملحوظه : هناك في شركات تأمين كتير بتعملك الموعد بتاع المقابلة وتملالك الابليكيشن بحوالي ٣٠ ليرة (ده مقابل ما بيملوا الابليكيشن بدالك….لكن اصلا الابليكيشن مجاني…وهو ده اللي بتاخد فيه ميعاد المقابلة )
10- بتقدم جميع الأوراق بمركز الأمنيات – فاتح. وبعدين في خلال شهر بتطلع الاقامه وتستلمها ..
.
المواعيد بسبب الضغط الرهيب بتبقي اقل حاجه بعد شهر و بعد ما بتقدم كل الاوراق بتستني حوالي 15 يوم او شهر كمان علي ما الاقامه تطلع ..
.———————————————————————
طيب لو عايز تعمل اقامه لابنك وهو اقل من 18 سنه او انت نفسك عندك اقل من 18 سنه وعايز تعمل اقامه ايه الاجراءات ؟؟
.
1- شهادة الميلاد الاصليه
.
2- في حاله الانفصااااااااااااااااااال بين الاب والام
* لو الاب او الام حد فيهم منفصل تجيب اصل شهادة الطلاق أو تجيب قرار المحكمه بالحضانه انها الحاضنه الوحيدة لو في مشاكل بينهم
* لو الاب او الام حد فيهم متوفي يجيب اصل شهادة الوفاه
.
3- في حاله ان الاباء مرتبطين وكله ميت فل واربعتاشر ولكن احد الاباء مأنتخ في مصر ومش موجود ف تركيا عندة شغل يعني ومش فاضي يسافر .. وقتها :
لو الام بتعمل الاقامه لاولادها لوحدها من غير الاب لازم تجيب وكاله من الاب
والعكس صحيح لو الاب بيعمل الاقامه لوحده من غير الام لازم يجيب وكاله من الام
ولو الاتنين هيعملوها مع بعض يجيبوا اصل شهادة الزواج
.
4- شهادة الدخول والخروج ودي بتطلع من الامنيات
والحاجات دي لازم تكون متوثقه الاول من الخارجيه في مصر وبعدين تتوثق في سفاره تركيا في مصر وبعدين تتوثق في حاجه اسمها قائم مقام في تركيا وبعدين تقدمها في الامنيات
——————————————————————
انت بتقول الاقامه بعد المقابله بتاخد 15 يوم أو شهر علي ما تطلع ؟؟ طب اصلا التأشيرة بتاعتي بتكون شهر واحد .. هعمل الاقامه ازاي وانا اصلا هكون كسرت الـتأشيرة ؟؟
.
لا متقلقش :
1- انت اهم حاجه تقدم اوراقك وتروح الرانديفو قبل انتهاء التأشيرة ولما بتروح الرانديفو بتاخد ايصال الايصال دة بتقدر بيه تقعد تستني الاقامه لغايه لما تطلع
و بتستني حوالي 15 يوم او شهر بالكتير بعد ما الرانديفو ما يخلص وبعد ما بتاخد الايصال
يعني انت لازم اول لما رجلك تلمس ارض تركيا تقوم مباشره تبدا ف الاجراءات عشان تعرف تاخد معاد وتروح الرانديفو قبل انتهاء مدة تأشيرتك
.
2- ممكن تعمل توكيل لاي صديق يستلمها مكانك ويبعتهالك بالبريد لو انت هترجع مصر يعني
.
3- بتقدر تعمل المعاد من وانت ف بلدك اصلا ( مكاتب كتير بتعملهالك ) وبتبعتله صور الباسبورات وبعدين قدم ع التأشيرة ولما تاخدها تقوم تسافر وتيجي علي معاد الرانديفو مباشره
يعني هنرجع لنقطه هين قرشك ولا تهين نفسك والكاركاديه بالنعناع .. كله بيخلص بالفلوس ..
——————————————————————
طيب  انا جبت فيزا سياحه و عملت تصريح امني و جيت تركيا و عملت كل الحوارات  دي وبقي معايا اقامه سياحيه
هاكل منين ؟؟ هشتغل ايه ؟؟ ايه انواع الشغل ؟؟ والمرتبات نظامها ايه ؟؟
.
طيب نمسك حاجه حاجه ونتكلم فيها
مفتاح الشغل في تركيا هو اللغه .. الترركي .. لازم تكون بتعرف تركي
.
1- اعرف تركي ازاي يعني ؟ يعني اكون fluent و اتكلم زي اتاتورك ؟؟
تعرف تركي يعني تبقي فاهم الجمل ومستوعبها وتقدر تعمل محادثه بينك وبين الي قدامك بحيث يكون فاهمك وفاهم كلامك حتي لو بتتكلم بلهجه تعبانه او مكسره
.
2- طيب انا بعرف انجلش كويس اوي اوي هل ينفع بدل التركي ؟
لا مينفعش ومش هتلاقي شغل محترم وعدل وأدمي بالانجلش
.
3- طب هو اللغه التركيه دي عشان اتعلم اتكلم بيها محتاج وقت قد ايه ؟
اللي يقولك علي رقم معين يبقي كداب .. في ناس اتعلمتها بعد 5 سنين وناس تانيه اتعلمتها بعد سنه وناس تالته اتعلمتها بعد 6 شهور وناس رابعه بتقعد عمرها كلها مش عارفه تتعلمها .. الموضوع حسب قدراتك واستيعابك ومجهودك وتفرغك في تعلم اللغه
.
4- طيب اتعلم منين التركي ؟؟
* لو انت ممعاكش فلوس وبتحب ال self study هديك لينكات جميع القنوات اللي بتعلمك التركي من علي الانترنت زي :
*https://www.youtube.com/user/ar1tr
*https://www.youtube.com/user/turkiyaganetelard
*https://www.youtube.com/channel/UCvB6gOqNHfg2qP2hpN8Yd0g
*https://www.youtube.com/watch?v=u7YOVk33K1Y
.
* في تطبيق سحري وممتاز جدا لممارسه اللغه في الأندرويد اسمه Doulingo هيفرق كتير اوي معاك ..
* اما لو انت معاك فلوس فهتاخد كورسات في المركز الثقافى التركى يونس إمرة في الدقي ..
.
.
5- طيب هي انواع الشغل هناك ايه والمرتبات كام ؟؟
مبدأيا .. اي شغل تركي ب 12 ساعه في اليوم .. ايوة 12 ساعه زي ما قريت كدة بالظبط
.
* لو شغل مبيحتاجش شهادة عليا ومن غير تركي : من 800 ل 1000 ليره
زي العمال بالظبط بمختلف انواعهم
.
* لو شغل مبيحتاجش شهادة عليا ومعاك تركي : من 1200 ل 1500 ليره
زي كول سنتر – مطاعم – كاشير – سواق
.
* لو معاك صنعه مميزة اوي ومعاك تركي : من 1500 ل 2000 ليره
زي سباك – نقاش – نجار
ولو بتفهم في الخياطة هتلاقي شغل كتير لان ورش تصنيع الملابس كتير جدا
.
* لو شغل بشهادات عليا وبعد المعادله بتاعتك ومعاك تركي : من 2000 ل 4000 ليره
زي دكتور – مهندس الخ الخ
.
هل في مرتبات اقل من الارقام دي ؟ ايوة طبعا اعرف حد شخصيا بياخد 750 ليره فقط في الشهر .. بس احنا بنتكلم علي الاغلبيه من الناس ..
.
ملحوظه رقم 1 : الشهادات الطبيه كلها بتحتاج لمعادله .. وعشان تعمل معادله لازم تتعلم تركي .. ولازم تمتحن وتاخد كورس تركي معتمد اكثر من 6 شهور
وبعد ما بتمتحن تركي بتقدم بقي علي موقع وزاره الصحه في انقره وبعدين بيحددولك الجامعه وجهه المعادله وتفاصيل المعادله وفلوسها
.
ملحوظه رقم 2 : الصيدله هي الشهادة الوحيدة اللي مينفعش حد اجنبي يشتغل فيها في تركيا . الصيدله للاتراك فقط
.
ملحوظه رقم 3 : عشان تشتغل بشهادتك الجامعيه في تركيا لازم معادله وعشان تعملها هتاخد اجراءات متقلش عن سنه من تعب تعليم لغه و اجراءات امتحانات يعني لازم تكون عارف انك هتتعب كتير عشان تشتغل بشهادتك
————————————————————–

تكاليف المعيشه في تركيا

.
اولا مصاريف المعيشه بتنقسم ل جزئين ..
* الجزء الاول اللي بياكل اي مرتب وهو السكن ..
* الجزء التاني وهو الاكل والشرب والمواصلات وفواتير ( مياه – كهربا – غاز – نت )
.
الجزء الاول اللي هو السكن : الايجارات بتختلف حسب المدينه .. وحسب المنطقه نفسها جوة كل مدينه ..
اسطنبول غاليه .. باقي المدن رخيصه
ايجار سكن شبابي .. شييرنج يعني .. بيتراوح ما بين 250 ل 300 ليره
ايجار شقه كامله اوضتين وصاله بيتراوح ما بين 800 ل 900 ليره
.
في حاجه اسمها كوميسيون .. وفي حاجه اسمها تأمين .. وفي حاجه اسمها بدون فواتير .. اتأكد من ال 3 حاجات دول قبل ما تمضي اي عقد عشان هتلاقي مشاكل كتير بسبب دة
.
يعني مثلا يقولك ايه ..  العرض السحري ايجار شقه 3 اوض وصاله ب 600 ليره .. تقوم انت تفرح .. يجيلك ف الاخر ويقولك تم اضافه الكوميسيون أو الفواتير   لازم تبقي واعي عشان اكثر حاجتين بينصبوا فيهم في تركيا : الاقامات وعقود الايجار

* الجزء التاني وهو الاكل والشرب والمواصلات وفواتير ( مياه – كهربا – غاز – نت )
لو اسره .. اب و ام .. و طفلين .. يعني اربع افراد زي معظم الاسر المصريه هتحتاج  فواتير غاز وكهرباء ومياه .. و اكل وشرب ومواصلات .. 1000 ليره في الشهر
.
يعني من الاخر كدة اسره اربع افراد هتعيش في اسطنبول محتاجين اقل حاجه 1800 ليره شهريا عشان تدفع ايجار سكن واكل وشرب و فواتير وكل حاجه .. يعني لازم الاب و الام يشتغلوا مع بعض عشان نكون واقعيين وصريحين ..
.
طب انت عمال تتكلم عن الاسره الاسره الاسره ! انا لوحدي هحتاج مصاريف كام ؟؟
.
انت عشان سنجل فممكن تعمل اي حاجه .. ممكن تنام مع 10 في الاوضه .. ممكن تقضيها وجبه واحدة ف اليوم … ممكن تقضيها سنكحه .. المقصود ان اي حد سنجل ممكن يحوش من اي مرتب بياخده اساسا ويعيش بأي مرتب بياخده
.
لكن انا بركز علي الاسره لان قرار الانتقال لأي اسره من مصر صعب وعايز دراسه ولازم نوعيهم .. انما انت سنجل يعني الحياه بيس معاك وهتدوس في اي حاجه وتستحمل وعموما المصاريف بتاعتك هتكون نص مصاريف الاسره
———————————————————————–
طيب انا عندي عيال في سن المدارس ايه وضعهم ؟؟
.
التعليم في المدارس الحكومية مجاني لاي مقيم حتي الاجنبي … لكن الدراسه في المدارس بالتركي .. وعشان انت اجنبي بتدرس سنه لغه الاول في المدارس ..
.
عندهم السنين الدراسيه مختلفه عننا .. احنا هنا 6 سنين ابتدائي و 3 اعدادي و 3 ثانوي
هما هناك 4 بس ابتدائي و 4 اعدادي ( بيسموه متوسط ) و 4 ثانوي
.
لو هتعلم ابنك في مدرسه خاصه او بمعني اصح مدرسه عربيه ( مش عايز تعلمه في مدارس الاتراك ) هتدفع متوسط حوالي 1000 دولار في السنه
.
في مدارس خاصه بتبقي ب 600 و 700 دولار و مدارس ب 1500 و 2000 دولار بس احنا بنتكلم علي المتوسط
.
التعليم الجامعي :
للاسف التعليم الجامعي مش مجاني ابدا للاجانب .. هو مجاني للاتراك بس
يعني لو عندك عيال في سن الجامعات لازم هيدفعوا فلوس
وطبعا الرسوم بتختلف حسب الجامعه وحسب التخصص .. لكن بتدخل في رينج 2000 دولار
.
لكن تقدر تقدملهم في المنحه التركيه اللي بتنزل كل سنه بحيث متدفعش اي مليم ليهم
ودي لينكات التقديم :
http://hajjajj.com/المنح-الدراسية-بكالوريوس-في-تركيا/
http://masdarona.com/scholarships-in-turkey-2017-2018

عن اسامه محمد

مدون عربي اهتم بكل ما هو جديد واقوم بتقديمه لكم

شاهد أيضاً

كيف الهجرة والسفر الى جزر برمودا الحصول علي الجنسيه الاقامه

كيف الهجرة والسفر الى جزر برمودا والحصول علي الجنسيه و الاقامه

كيف الهجرة والسفر الى جزر برمودا والحصول علي الجنسيه و الاقامه في البدايه معلومات عن ...

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *