الرئيسية / السفر و الهجره / كيف يمكن الهجره الي كندا و ما هي شروط الهجرة و الحصول علي اقامة

كيف يمكن الهجره الي كندا و ما هي شروط الهجرة و الحصول علي اقامة

في البدايه يجب ان نعلم بعض المعلومات عن كندا كَنَدَا  رسمياً إتحاد كندا هي دولة في أمريكا الشمالية تتألف من 10 مقاطعات وثلاثة أقاليم. تقع في القسم الشمالي من القارة وتمتد من المحيط الأطلسي في الشرق إلى المحيط الهادئ في الغرب وتمتد شمالاً في المحيط المتجمد الشمالي.

كندا هي البلد الثاني عالمياً من حيث المساحة الكلية. كما أن حدود كندا المشتركة مع الولايات المتحدة من الجنوب والشمال الغربي هي الأطول في العالم.

علشان تهاجر لكندا لازم تكون تحت واحدة من الحاجات دي:

أولا مستثمر:
مفهومة طبعا، معاك فلوس وجاي تعمل مشروع/مشاريع في البلد.

الثاني entrepreneur:
المبلغ أقل شوية.

الثالث وده من “المهمين” عمال مهرة: (فيه طبعا حاجات تانية زي الدراسة ولم الشمل) بس هنا هتكلم عن الـ Express Entry

العمال المهرة:
ودي بتبقى مهن محددة من قبل الحكومة بتنزل كل فترة، زي الكهربائية، النجارين، السباكين، مشغلى اللودرز والكرينز. بس لازم يكون عندك كل الاثباتات واختبارات وبشهادات. علشان تجيب سكور يأهلك للهجرة.

**يعني إيه سكور؟
الهجرة لكندا بتعتمد على الدرجات/النقاط، سكور من 100، والحد الأدنى بتاعه 67.
يعني سكور لكل حاجة زي (الخبرة، اللغة، المؤهل، العمر، عقد العمل، القرايب والعائلة)

– اللغة:
ودي 28 نقطة وفيها لغتين إنجليزي وفرنساوي، ممكن تختارهم الإتنين وواحدة فيهم تسجلها لغة أولى وواحدة لغة تانية أو ممكن تختار واحدة بس. وفيه تقييم CLB إختصار Canadian Language Benchmarks وطبعا فيه IELTS.
أو اختبار TEF للفرنساوي، وده من Chambre de Commerce et d’Industrie de Paris – CCIP
هتمتحن Speaking, Listening, Reading, Writing يعني 7 في كل قسم بحد أقصى، ولو جيبت أقل من 5 مش هتاخد أي نقط. يعني تجيب 7 ماشي .. 6 ماشي .. 5 ماشي… 4 تروح ..

– التعليم:
وده النقط بتاعته 25 نفطة، لو معاك PHD ده 25 نقطة لوحده، ولو ماسترز 23، ولو معاك “إتنين” بكاروليوس 22 نقطة، لو واحد 21 نقطة، معهد سنتين 19 نقطة، معهد سنة واحدة 15 نقطة، مدرسة 5 نقط.

معادله الشهادات المصريه للنظام الكندي
يعني معاك بكالويوس تجاره او هندسه او ايا كان
دا يساوي ايه عندنا في كندا عشان نديك النقاط عليه ؟؟

*** لازم تدخل علي موقع wes
World education system
وتعمل اكونت ب ٢٣٣ دولار كندي وتاخد رقم كودي

ولازم تراسل ادارة الجامعه
عشان ترسل بيان الدرجات بتاعك بالانجليزيه في ظرف موثق ومختوم ويتم ارساله لعنوان ال wes ومكتوب علي الخطاب رقم الكود بتاعك

وبيردوا عليك يقولولك الشهاده دي تعادل شهاده كذا في النظام الكندي وتاخد عليها كذا نقطه

– الخبرة:
ودي من 15 نقطة، بس إستنى بقى، مبتبقاش أي وظيفة، دي لازم تكون متسجلة في الـ NOC أو National Occupational Classification في كندا، يعني موجودة في الـ List بتاعتهم.
ودرجات الخبرة كالتالي:
سنة = 9 نقط
2-3 = 11 نقطة
4-5 = 13 نقطة
6 وأكتر = 15 نقطة

– السن:
وده 12 نقطة
18-35 = 12 نقطة
كل سنة بتزيد بتقل نقطة، يعني 36 = 11 … وهكذا ..

– عقد العمل أو Arranged Employment In Canada :
وده 10 نقط ومفيهمش رغي كتير معاك عقد هتاخد 10 نقط مش معاك مش هتاخد نقط

– القرايب/ العائلة في كندا:
وده الزوجة أو القرايب من الدرجة الأولى ودول بيدوك 5 نقط
لو ليكوا قرايب في كندا بتاخدوا 5 نقط.

هنا هتلاقي تفاصيل النقاط بشرح أكبر
http://www.cic.gc.ca/english/express-entry/grid-crs.asp

**الإجراءات:
ممكن متحتاجش محامي يعمله، لو عارف ومتأكد من كل الخطوات، بس لو متلخبط يبقى تشوف محامي هجرة يساعدك.
هتدخل هنا http://www.cic.gc.ca/english/ ده الموقع الرسمي، إقرا فيه على قد ما تقدر، لو معرفتش يبقى حضرتك مش نافع من أولها وتروح تتعلم إنجليزي قبل ما تحاول.
بعد ما بتعمل الـApplication من هنا
http://www.cic.gc.ca/english/e-services/mycic.asp
وبتجاوب ع الأسئلة الموجودة، بتطلع النتيجة بإنك تنفع ولا لأ!!
ولو تنفع بتاخد Personal Reference Code، لازم تحتفظ بيه متضيعوش…
بعدين هتبدأ في خطوات إنشاء حساب ع الموقع وده مهم جدا علشان هو ده اللي هتتعامل من خلاله مع الحكومة والـApplication.
http://www.cic.gc.ca/english/e-services/mycic.asp
هيظهر قدامك إختيارين
1- Sign in Partner SecureKey Concierge وده بتاع الناس اللي عايشين هناك وعندهم حسابات بنكية.
2- GCKey the government of Canadan Credentials وده للناس اللي بره كندا.

هتختار رقم إتنين وتبدأ تدخل بياناتك.
بعدها هتتنقل على حاجة تانية فيها أنواع الفيزا، ومنها Express Entry.. إختارها
بعد ما تختارها هتروح صفحة تانية بأسئلة جديدة أكثر عمقا بقى، يعني معلومات عن خبراتك وعيلتك وكل واحدة منهم ليها استمارة خاصة، متزهقش، إملا البيانات كلها.
أول ما بتعدي المرحلة “لو قبلت” هيطلبوا منك الـ Personal Referrence Code فاكره؟ تروح مدخله في المكان المطلوب.

بعد الخطوة دي بتجيلك خطوة مفرحة 😀 .. الموقع بيطلب منكط تسجل في قاعدة بيانات التوظيف الكندية، اللي هو بيزود فرصتك في الشغل وإنك تجيب درجات أعلى.

بعد دراسة ملفك بيبعتوا يقوللك إعمل الكشف الطبي (بيبعتولك عناوين دكاترة معينين في بلدك) والدكتور بيبعتلهم النتيجة، ويسألوك عن إثباتات للدرجات اللي إنت كتبتها في الـApplication مع شوية ورق:
1- شهادة تحديد مستوي اللغة الإنجليزية IELTS أو الفرنسية TEF أو كلتاهما.

2- الـCV بالإنجليزي طبعا.

3- شهادات الخبرة ليك ولمراتك (لو متجوز).

4- الشهادات الدراسية ليكوا ولولادكوا.

5- شهادات الميلاد.

6- قسيمة الجواز.

7- 8 صور لكل اللي مقدمين.

8- صورة جواز السفر لكل اللي مقدمين.

9- شهادة من الشرطة (فيش وتشبيه) من البلد الأم.

10- شهادة من البنك بمبلغ يحدد حسب عدد أفراد الأسرة المهاجرة.

بعد ما بتبعت الحاجات دي ليهم، الحمد لله مشيت على خير هيبعتوا يطلبوا منك تبعت الباسبور على عنوان وأكتر الناس بتقول “سفارة كندا في لندن”، لو لأ وده نادر جدااااااا، بيعمل إنترفيو.. وده بيحصل لو إنت عكيت في الورق أو فيه أي حاجة مشكوك فيها في الورق أو عنك شخصيا.
بعدين…
بيبعتولك الباسبور عليه فيزا صالحة لسنة واحدة وللدخول مرة واحدة ، يعني لو عدت سنة وما دخلتش راحت عليك، ولو دخلت مينفعش تطلع وتدخل تاني.
وصلت.. بالسلامة ؟
وإنت في المطار بتدخل مكتب CIC وبيقعدوا معاك يخلصولك ورقك وبيثبت الدخول، وأصبحت مقيم دائم في البلد، ليك حقوق الكنديين، بس مالكش حق تكون مرشح في أي انتخابات، ومينفعش تدي صوتك، ولو عملت مصيبة ممكن يرحلوك.

نصايح عامة تخص موضوع الهجرة لكندا :

١- أي معاملات رسميه بتتم فقط عن طريق الموقع الرسمي cic http://www.cic.gc.ca/ومفيش أي بديل.
وأي موقع أو مكتب هجره بياخد منك رسوم وبيكون وظيفته فقط يساعدك في التسجيل وتوفير متطلبات الـ cic

٢ – القرابة
لازم يكون اقارب درجه اولي
اب – ام – اخ – اخت – زوج – زوجه

٣ – لو متجوز، لازم مراتك يكون معاها ايليتس وبتقدم قسيمه زواج مترجمه ترجمه قانونيه وموثقه بختم الخارجيه والزوجه بتديلك ٥ نقاط.

٤ – طبعا جميع الاوراق والمستندات تكون باللغه الانجليزيه واما تطلب من الجامعه شهاده مؤهل بالانجليزيه او تروح مكاتب ترجمه وتوثيق معتمده.

٥ – لو مش متجوز لازم يكون في حسابك البنكي مبلغ يعادل ١٢,٥٠٠ دولار كندي لاخر ٥ شهور ولو متزوج يكون حسابك ١٥,٥٠٠ دولار كندي (او ما يعادلهم باي عمله طبعا) ولو فيه اطفال مرافقين بيزيد المبلغ، عشان تغطي مصاريف حياتك عقبال ما تقف علي رجلك وتستلم شغل.

٦ – لو معاك رخصه قياده في الإمارات، روح الـRTA وخد شهاده خبره باخر سنتين لانها هتساعدك في اجراءات الرخصه هناك وهتبقي مطالب بفحص نظر واختبار طريق وبس واعمل رخصه دوليه لانها هتسمحلك بالقياده داخل كندا لمده سنه.

٧ – لو معاك عربية هنا، لو مواصفات خليجيه يبقي لازم تبيعها او تحاول تستبدلها بمواصفات امريكيه وساعتها تقدر تتواصل مع شركات شحن في جبل علي وتشحنها ب ٣ الاف دولار لحد تورنتو في كندا شامله كل الاوراق والتراخيص والجمارك.
( جمارك كندا لا تسمح باستيراد اي مواصفات غير الامريكيه والكنديه )

عن اسامه محمد

مدون عربي اهتم بكل ما هو جديد واقوم بتقديمه لكم

شاهد أيضاً

السياحة فى البرتغال

السياحة فى البرتغال

تعتبر البرتغال احدى الدول الاوربية التي تقع فى جنوب غرب القارة الاوربية ، تبلغ مساحة ...

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *